Репертоар:

Oтворена изложбата на Ангел Миов во Кавадарци

Изложба на дела од ликовниот уметник Ангел Миов беше отворена синоќа во галеријата при Домот на културата „Иван Мазов Климе” од Кавадарци.

Изложбата е во рамки на традиционалната манифестација „Кавадаречка културна есен”, со поддршка од општината. 

- Кавадарци останува град богат со културни настани организирани од трите културни установи. Вечерва ја имаме честа да ги видиме делата на младиот автор за кои се напишани бројни позитивни коментари, рече Владимир Темков, директор на културниот дом.

Миов е професор на Факултетот за ликовни уметности во Скопје. Роден е 1982 година во Гевгелија. Има бројни самостојни и групни изложби, како и учество на многу колонии и фестивали.

- Делата нека зборуваат, рече авторот, заблагодарувајќи се на можноста да се претстави пред кавадарчани.

Изложбата е во соработка со Дирекција за култура Скопје, која всушност е и носител на проектот „Кич да? Сте или не?”. Директорот на Дирекцијата, Никола Глигоров изрази задоволството што повторно е во Кавадарци, како и пред 12 години кога овој проект ги имал своите почетоци токму во овој град.

- Многу внимаваме при изборот на изложбите, кич секако не, нагласи тој меѓу другото, заблагодарувајќи се за поддршката на Министерството за култура на Република Македонија и Домот за култура во Кавадарци.

За Кавадарци рече дека е град која се одликува со интензивен и квалитетен културен живот.